काठमाडौं– नेपाली कांग्रेसले पार्टीको कोषाध्यक्षको जिम्मेवारी उमेश श्रेष्ठलाई दिएएको छ। श्रेष्ठलाई सभापति शेरबहादुर देउवाले पार्टीको कोषाध्यक्षको जिम्मेवारी दिएको जानकारी कांग्रेस केन्द्रीय कार्यालयका मुख्यसचिव कृष्णप्रसाद पौडेलले दिएका छन् ।
‘नेपाली कांग्रेसका सभापति शेरबहादुर देउवाले पार्टीको विधान, २०१७ (संशोधन सहित) को धारा २१ को उपधारा (४) बमोजिम केन्द्रीय कार्यसमितिका निर्वाचित सदस्य उमेश श्रेष्ठलाई केन्द्रीय कार्यसमितिको कोषाध्यक्ष पदमा मनोनयन गर्नु भएको छ’, पौडेलले भनेका छन् ।
श्रेष्ठले लामो समयदेखि कांग्रेसको आर्थिक विभागमा थिए । यसअघि कांग्रेसमा रहेका श्रेष्ठसहितका उद्यमी नेताहरूले गरिखाने अभियान चलाएका थिए ।
उनले ०७९ को निर्वाचनमा उनी चितवन क्षेत्र नम्बर २ बाट चुनाव लडेका थिए । तर, उनी रास्वपाका सभापति रवि लामिछानेसँग पराजित भएका थिए ।
भोजपुरका पुर्ख्यौली थलो भएका उनी पछिल्लो समय चितवनमा पनि सक्रिय छन् । श्रेष्ठ लिटिल एन्जेल्स स्कुलका सञ्चालक पनि हुन् ।
