काठमाडौं । एएफसी च्यालेन्ज लिगको प्रारम्भिक चरणमा आज चर्च ब्वाइज युनाइटेड र भुटानको पारो एफसीबीच खेल हुदै छ ।
एघार विदेशी खेलाडीसहित नेपाल आएको पारो बलियो टिम रहेको छ । त्यस्तै चर्च ब्वाइजमा तीन विदेशी र अधिकांश राष्ट्रिय टिमबाट खेल्ने खेलाडी रहेका छन् । पारोले अघिल्लो वर्ष दशरथ रंगशालामा नै एएफसी कप पहिलो चरणमा मच्छिन्द्र क्लबसँग ३-२ गोलको हार बेहोरेको थियो । चर्च ब्वाइजले जीत हात पारे समूह चरणमा प्रवेश पाउनेछ । खेल आज साँझ ६ बजे सुरु हुनेछ ।
यस अघि सोमबार चर्च ब्वाइजले दशरथ रंगशालामा प्रशिक्षण गर्न पाएन भने उसले सातदोबाटोस्थित एन्फा कम्प्लेक्समा अभ्यास गरेको थियो । त्यस्तै पारोले भने रंगशाला तयार नभएपछि आइतबार भद्रकालीस्थित आर्मी मैदानमा अभ्यास गरेको थियो ।
