काठमाडौँ । अमेरिकी पूर्व राष्ट्रपति डोनाल्ड ट्रम्पले वर्तमान राष्ट्रपति जो बाइडेनलाई गल्फ खेल्न चुनौती दिएका छन् । ट्रम्पले बाइडेनसँग हारे भने उनले राष्ट्रपतिको रोजाइको परोपकारी संस्थालाई १० लाख डलर दान गर्ने घोषणा गरेका छन् ।
डोनाल्ड ट्रम्पले दक्षिण फ्लोरिडाको एक र्यालीमा बाइडेनलाई चुनौती दिँदै भने, 'म आधिकारिक रूपमा राष्ट्रपति जो बाइडेनलाई यहाँ डोरालको ब्लू मोन्स्टरमा १८-होल गल्फ म्याचमा चुनौती दिन्छु, जसलाई विश्वको सर्वश्रेष्ठ गोल्फ कोर्स मध्ये एक मानिन्छ ।'
पूर्व अमेरिकी राष्ट्रपति ट्रम्पले भने, यदि यो प्रतियोगिता भयो भने यो इतिहासमा सबैभन्दा धेरै हेरिएको प्रतियोगिता हुनेछ । सायद यो राइडर कप वा मास्टर्स भन्दा ठूलो घटना हुनेछ । यद्यपि, ट्रम्पले भने, बाइडेनले यो प्रस्तावलाई कहिल्यै स्वीकार गर्दैनन् ।
गल्फ खेल्ने ट्रम्पको प्रस्तावमा, बाइडेन टोलीले राष्ट्रपतिसँग त्यस्ता कामका लागि समय नभएको जवाफ दिएका छन् ।
बाइडेन टोलीले ट्रम्पको प्रस्तावलाई अस्वीकार गरेको छ । न्युयोर्क पोस्टका अनुसार राष्ट्रपतिका प्रवक्ता जेम्स सिंगरले एक विज्ञप्तिमा भनेका छन्, '१२ दिनदेखि सार्वजनिक रूपमा नदेखिएका डोनाल्ड ट्रम्प अब फर्केर संयुक्त राज्य अमेरिकाका राष्ट्रपतिलाई गल्फको खेलमा चुनौती दिइरहेका छन् ।'
बाइडेनका प्रवक्ताले थप भने, ‘हामी ट्रम्पलाई रोजगारी सिर्जना गर्न चुनौती दिन्छौं, यद्यपि उनी सत्तामा हुँदा देशमा करिब ३० लाख मानिसले रोजगारी गुमाएका थिए । हामी ट्रम्पलाई पुटिनको सामना गर्न चुनौती दिन्छौं, तर उनी उनको अगाडि झुक्छन् । हामीले ट्रम्पलाई कानूनको पालना गर्न आग्रह गर्छौं तर उनले उल्टो गर्छन् ।'
प्रवक्ता जेम्स सिंगरले थप भने- राष्ट्रपतिसँग डोनाल्ड ट्रम्पको अनौठो गतिविधिका लागि समय छैन । उनी अमेरिकाको नेतृत्वमा व्यस्त छन् । ट्रम्प एक झूटा, अपराधी र धोखाधडी व्यक्ति हुन्, जसले आफ्नो लागि मात्र काम गर्दछन् ।
गत महिना, जुन २७ मा डोनाल्ड ट्रम्प र जो बाइडेनबीच पहिलो चुनावी बहस भएको थियो। यसै क्रममा सीएनएन एन्करले ट्रम्पलाई उमेरको बारेमा प्रश्न सोधेका थिए । जवाफमा ट्रम्पले आफ्नो स्वास्थ्य बाइडेनको भन्दा धेरै राम्रो रहेको बताए । ट्रम्पले भर्खरै दुईवटा क्लब-स्तरीय गल्फ प्रतियोगिता जितेको बताएका थिए ।
