काठमाडौँ । भारतबाट भागेर लन्डनमा बसिरहेका विजय माल्या अहिले फेरी चर्चामा रहेका छन् । यस पटक उनको चर्चा भने कारोबारको कारण नभएर उनको छोराको कारणले हो । उनका छोरा सिद्धार्थ माल्या वैवाहिक बन्धनमा बाधिन लागेको विषय अहिले सामाजिक संजाल र मिडियामा चर्चाको विषय बनेको छ ।
सिद्धार्थले लामो समयदेखिकी प्रेमिका जास्मिनसँग विवाद गर्न लागेको जानकारी दिएका छन् । सिद्धार्थको विवाह यसै साता हुने बताइएको भएपनि स्थान र समय भने खुलाइएको छैन । रिपोर्टका अनुसार विवाह लन्डनमा हुने बताइएको छ ।
सिद्धार्थले यस अघि २०२३ को नोभेम्बरमा जस्मिनसँग इन्गेजमेन्टको घोषणा गरेका थिए । लस एन्जल्समा जन्मिएका सिद्धार्थ लन्डन र युएईमा हुर्किएका थिए । सिद्धार्थले लन्डनको वेलिंगटन कलेज र क्विन मेरी युनिभर्सिटीबाट अध्ययन गरेका छन् भने रोयल सेन्ट्रल स्कुल अफ स्पीच एण्ड ड्रामाबाट अभिनय सम्बन्धि पढाई गरेका छन् ।
सिद्धार्थको एक समय बलिवुड अभिनेत्री दीपिका पादुकोणसँग अफ्येर्स रहेको चर्चा थियो । २०११ को आइपिएलमा सिद्धार्थले दीपिकालाई सार्बजनिक रुपमा किस गरेको तस्बीर निकै चर्चित भएको थियो । तर छोटो सम्बन्ध पछि उनीहरु अलग भएको बताइएको थियो ।
भारतको चर्चित युबी समुहका चेयरम्यान तथा आइपिएल टिम आरसिबीका मालिक रहेका विजय माल्या भारतमा बैंकबाट लिएको ऋण नतिरेको आरोप लागेपछि लन्डन बसेका छन् । उनलाई भारत ल्याउन सरकारले कानुनी लडाई लडिरहेको भएपनि अहिलेसम्म सफल हुन सकेको छैन ।
