म्यानमारले संकटकाल ६ महिना थप गरेको छ। म्यानमारको राष्ट्रिय रक्षा र सुरक्षा परिषद्ले दक्षिणपूर्वी एसियाली देशमा आपतकालीन अवस्था ६ महिना थप गरेको हो ।
कार्यवाहक राष्ट्रपति यू मिन्ट स्वेले एनडीएससीको बैठकमा आपतकालीन अवस्था ६ महिना लम्ब्याइएको घोषणा गरे। देशको असामान्य परिस्थितिका कारण राज्यको संविधानको धारा ४२५ बमोजिम म्याद थप गरेको उनले बताए।
बैठकमा टेलिकम ठगी नियन्त्रण, देशको विकास र शिक्षा क्षेत्रको प्रवर्धन, निर्वाचनको तयारी र राष्ट्रिय जनगणनाको तयारीका विषयमा पनि छलफल भएको बताइएको छ। म्यानमारले फेब्रुअरी २०२१ मा एक वर्षको लागि आपतकाल घोषणा गरेको थियो। त्यसपछि यसलाई पटकपटक गरी यो वर्ष जनवरी ३१ सम्म बढाइएको थियो।
