एजेन्सी । एक थाई पारा-एथलीट तथा पूर्व सैनिकले आफ्नो विवाहमा आत्महत्या गर्नु अघि आफ्नी दुलही र अन्य तीन जनालाई गोली हानेका छन् । प्रहरीले यो जानकारी बीबीसीलाई दिएको छ ।
२९ वर्षीय चतुरोङ सुक्सुक र ४४ वर्षीया कञ्चना पचुन्थुकले शनिबार उत्तरपूर्वी थाइल्याण्डमा विवाह गरेका थिए ।
मिडिया रिपोर्टका अनुसार उनी अचानक आफ्नो विवाह समारोह छोडेर बन्दुक लिएर फर्किए । त्यसपछि उनले श्रीमती, ६२ वर्षीया आमा र ३८ वर्षीया बहिनीलाई गोली हाने ।
अन्य दुई पाहुनालाई पनि गोली लागेको थियो र अस्पताल लगिएको थियो । एक जनाको उपचारको क्रममा मृत्यु भयो।
प्रहरीका अनुसार घटनाको समयमा चतुरोङ "अत्यधिक मादक" थिए, तर उनको यस्तो गर्नुको कारण स्पष्ट हुन सकेको छैन।
स्थानीय मिडियाका अनुसार पार्टीका पाहुनाहरूले प्रहरीलाई भने कि दम्पतीबीच कुनै विषयमा विवाद भएको थियो। आफ्नी श्रीमतीसँगको उमेरको भिन्नतालाई लिएर उनी अलि अप्ठ्यारोमा परेको बताएका छन् ।
चतुरङ र कञ्चना बिहे गर्नुअघि तीन वर्ष सँगै बसेका थिए ।
चतुरोङले गत वर्ष इन्डोनेसियामा सम्पन्न आसियान पारा खेलकुदमा पौडीमा रजत पदक जितेका थिए । उनले अर्धसैनिक लाइट फोर्समा पनि सेवा गरे र कर्तव्यमा रहँदा दाहिने खुट्टा गुमाएका थिए।
