काठमाडौं- ह्यारी केनको ह्याट्रिक गोलमा बायर्न म्युनिखले बारुसिया डर्टमन्डमाथि ४-० को जित निकालेको छ। जर्मन लिग बुन्डेसलिगामा शनिबार राति भएको खेलमा बायर्नले प्रभावशाली जित निकालेको हो।
बायर्नको जितमा ह्यारी केनले ह्याट्रिक गर्नुका साथै उपमेकानोले १ गोल गरे। खेलको चौथो मिनेटमै लियरो सानेको पासमा उपमेकानोले गोल गर्दै बायर्नलाई अग्रता दिलाएका थिए।
९ मिनेटमा सानेकै पासमा केनले गोल गर्दै अग्रता दोब्बर बनाए। ७२औं मिनेटमा कोमनको पासमा केनले अर्को गोल गरे। ९० मिनेटपछिको अतिरिक्त समयमा केनले अर्को गोल गरेपछि बायर्नले ४-० को जित निकाल्यो। जितसँगै १० खेलबाट २६ अंकका साथ बायर्न लिगको दोस्रो स्थानमा छ।
