काठमाडौं। बर्नमाउथमाथि शानदार जित निकाल्दै म्यानचेस्टर सिटी इंग्लिस प्रिमियर लिगको शीर्ष स्थानमा उक्लिएको छ। गएराति भएको खेलमा सिटीले सिटीले बर्नमाउथलाई ६–१ को फराकिलो अन्तरले पराजित गरेको हो।
सिटीको जितमा बर्नाडो सिल्भाले २, जेरेमी डोकु, मानुएल आकान्जी, फिल फोडेन र नेथन आकेले समान १ गोल गरे। खेलमा डोकुको ४ वटा असिस्ट रहेको थियो।
जितपछि सिटी ११ खेलमा २७ अंक जोड्दै शीर्ष स्थानमा उक्लिएको छ। बर्नमाउथ भने ६ अंक सहित १७औं स्थानमा छ। गएराति नै भएको खेलमा म्यानचेस्टर युनाइटेडले फुलह्याममाथि १–० को युकठिन जित निकाल्यो।
एन्थोनी गोर्डनको विवादास्पद गोलमा न्युक्यासलले इङ्लिस प्रिमियर लिगमा आर्सनललाई १–० ले हराएको छ। शनिबार राति घरेलु मैदान सेन्ट जेम्स पार्कमा भएको खेलमा गोर्डनले ६४औं मिनेटमा गोल लाइनबाट गोल गरेका थिए। वर्षाले प्रभावित खेलमा भिडियो असिस्टेन रेफ्रीले गोलको मान्यता दिएको थियो।
जुन गोल गर्दा न्युक्यासलका स्ट्राइकरले आर्सनलका रक्षकलाई बक्सभित्र लडाएका थिए। जितपछि न्युक्यासल ११ खेलबाट २० अंकसहित छैटौं स्थानमा उक्लिएको छ। आर्सनल समान खेलबाट २४ अंकसहित तेस्रो स्थानमा झरेको छ।
अन्य खेलमा ब्रेन्टफर्ड, क्रिस्टल प्यालेस र सेफिल्ड युनाइटेडले जित निकाल्दा एभर्टन र ब्राइटनले भने १–१ को बराबरी खेलेका छन्।
