सियोल । उत्तर कोरिया र रूसबीचको सम्बन्धप्रति अमेरिकाले गरेको शत्रुतापूर्ण अभिव्यक्ति गलत भएको प्योङयाङले जनाएको छ । आइतबार उत्तर कोरियाका उपविदेशमन्त्री इम चोन इलले जारी गरेको प्रेस विज्ञप्तिमा अमेरिकाको आलोचना गर्नुभएको कोरियाली केन्द्रीय समाचार संस्थाले उद्धृत गरेको छ ।
उत्तर कोरियाका उपविदेशमन्त्री इलले उत्तर कोरिया र रूसबीचको सम्बन्धको विकासप्रति अमेरिकाको शत्रुता र दुई देशबीचको द्विपक्षीय सहयोगले विश्व शान्ति र सुरक्षाका लागि खतरा उत्पन्न गरेको भन्दै आलोचना गरेका हुन् ।
वक्तव्यमा भनिएको छ, ‘शीतयुद्ध शैलीको मुठभेडको तर्कमा आधारित अमेरिकी आधिपत्यमुखी सोचको ज्वलन्त अभिव्यक्ति अमेरिकी वक्तव्यबाजी हो ।’
उक्त वक्तव्यमा अमेरिका–जापान–दक्षिण कोरिया त्रिपक्षीय सैन्य गठबन्धन र नेटोको निन्दा गर्दै दुवैलाई ‘संयुक्त राष्ट्रसङ्घको बडापत्रको उद्देश्य र सिद्धान्तका आधारमा अन्तर्राष्ट्रिय व्यवस्थालाई खतरामा पार्ने र विश्व शान्ति र सुरक्षाका लागि गम्भीर खतरा खडा गर्ने क्यान्सरजस्ता संस्था’ को संज्ञा दिइएको छ ।
‘उत्तर कोरियाले रुस र अन्य स्वतन्त्र सार्वभौम राष्ट्रहरूसँग मित्रता र सहयोगको परम्परागत सम्बन्धलाई थप विकसित गर्नेछ, कोरियाली प्रायद्वीप र बाँकी विश्वमा शान्ति र सुरक्षाको दृढ प्रतिरक्षामा साम्राज्यवादीहरूको सैन्य खतरा, उक्साहट र ज्यादती र स्वेच्छाचारी अभ्यासहरूको प्रतिरोध गर्नेछ,’ विज्ञप्तिमा भनिएको छ ।
