सियोल । उत्तर कोरियाको आणविक धम्कीलाई जवाफ दिन आफ्नो शक्ति प्रदर्शन गर्न अमेरिकाले दक्षिण कोरियामा अर्को आणविक सक्षम पनडुब्बी तैनाथ गरेको छ।
दक्षिण कोरियाली सेनाले दिएको जानकारी अनुसार अमेरिकी सेनाले जुलाई महिनामा कोरियाली प्रायद्वीपमा पठाएको यो दोस्रो ठूलो पनडुब्बी हो । सेनाका अनुसार युएसएस केन्टकी पनडुब्बी बुसानको मुख्य भूमि बन्दरगाहमा आइपुगेको करिब एक हप्तापछि युएसएस अन्नापोलिस पनडुब्बी जेजु आइल्याण्डमा प्रवेश गरेको थियो।
यूएसएस केन्टकी सन् १९८० को दशकपछि दक्षिण कोरियामा तैनाथ गरिएको पहिलो आणविक हतियारयुक्त पनडुब्बी थियो। यो तैनाथीको जवाफमा उत्तर कोरियाले ब्यालेस्टिक र क्रुज मिसाइल प्रहार गरेको थियो । यी क्षेप्यास्त्र प्रक्षेपणहरू मार्फत कथित रूपमा यस क्षेत्रमा तैनाथ दक्षिण कोरिया र अमेरिकी पनडुब्बीलाई लक्षित परमाणु हतियार क्षमता रहेको देखाउने प्रयास गरेको छ।
युएसएस अन्नापोलिसको मुख्य लक्ष्य दुश्मन देशहरुको जहाजहरु र पनडुब्बी नष्ट गर्नको लागी बनाइएको हो । यो पनडुब्बी एक आणविक पावर प्लान्टबाट संचालित छ तर यसमा परम्परागत हतियार तैनाथ गरिएको छ ।
दक्षिण कोरियाली नौसेनाका प्रवक्ता जाङ डो यङले युएसएस अन्नापोलिस पनडुब्बी मुख्यतया सामान ढुवानी गर्न जेजु आइपुगेको बताए। तर अमेरिका र दक्षिण कोरियाका सेनाले पनि पनडुब्बी सञ्चालनका लागि तालिमको व्यवस्था गर्ने कि नगर्ने भन्ने विषयमा पनि विचार गरिरहेका छन् ।
उता, उत्तर कोरियाले सोमबार पनि दक्षिण कोरियाबाट सीमा पार गरी यसै महिनाको सुरुमा देश प्रवेश गरेका अमेरिकी सैनिक ट्राभिस किङको बारेमा भने मौनता कायम राखेको छ ।
किङले गत अक्टोबरमा एक अज्ञात व्यक्तिलाई आक्रमण गरी सियोलमा प्रहरीको गाडीमा क्षति पुर्याएको अभियोगमा दक्षिण कोरियाको जेलमा झण्डै दुई महिना बिताएका थिए। उनलाई जुलाई १० मा रिहा गरिएको थियो र सोमबार फोर्ट ब्लिस टेक्सासमा घर फर्किने कार्यक्रम थियो तर टेक्सास जानुको सट्टा किंग गत मंगलबार बिहान पर्यटकहरूको समूह लिएर दक्षिण र उत्तर कोरियालाई विभाजन गर्ने उत्तर कोरियाको सीमामा प्रवेश गरी असैनिकीकृत क्षेत्रमा प्रवेश गरेका थिए । उनकाे रिहाइका बारेमा भने अझै कुनै निर्णय भएकाे छैन ।
