एजेन्सी – जापानका प्रधानमन्त्री फुमियो किशिदाले टोकियोका मुख्य तेल आपूर्तिकर्ताहरूसँग ऊर्जा सुरक्षा र स्वच्छ ऊर्जा सहकार्यमा केन्द्रित खाडी भ्रमण पूरा गर्ने क्रममा इन्धनका लागि धनी राष्ट्र कतार पुगेका छन् ।
जापानले तरलीकृत प्रकृतिक ग्याँस (एलएनजी) को विश्वव्यापी बजारलाई स्थिर बनाउन कतारसँग मिलेर काम गर्न चाहेको किशिदाले सोमबार प्रकाशित कतारको आधिकारिक समाचार एजेन्सीलाई दिएको अन्तर्वार्तामा बताएका थिए ।
जापानी प्रधानमन्त्रीका रूपमा करिब १० वर्षमा पहिलो पटक दोहा पुग्नुभएका उनले यसपहिले संयुक्त अरब इमिरेट्स (युएई) र आइतबार साउदी अरेबियाको भ्रमण गरेका थिए । उनले साउदी अरबका वास्तविक नेता तथा राजकुमार मोहम्मद बिन सलमानसँग भेट गरेका थिए ।
पछिल्लो पटक सन् २०२० मा जापानी प्रधानमन्त्री शिन्जो आबे खाडी भ्रमणमा गएका थिए ।
जापानको राष्ट्रिय प्रसारक एनएचकेका अनुसार किशिदाले कतारका अमिर शेख तमिम बिन हमाद अल थानीसँग ‘एलएनजीको स्थिर आपूर्ति सुनिश्चित गर्न’ सहयोगका लागि भेट्ने कार्यक्रम तय भएको हो ।
ब्लुमबर्गका अनुसार जापानी कम्पनीहरूले कतारसँग नयाँ दीर्घकालीन इन्धन आपूर्ति सम्झौतामा वार्ता गरिरहेका बेला दोहाको भ्रमण हुन लागेको हो ।
जापानको एलएनजी आयातकर्ताहरूले सन् २०१४ देखि कतारसँग सम्झौतामा हस्ताक्षर गरेका छैनन् र टोकियोमा कतारी ग्याँस आपूर्तिमा गत वर्ष ६० प्रतिशतभन्दा बढीले गिरावट आएको छ ।
जापानको शीर्ष एलएनजी आयातकर्ता जेराले प्रतिवर्ष ५५ लाख टन ग्यास आपूर्तिका लागि सन् २०२१ मा म्याद समाप्त भएको सम्झौता नवीकरण नगरेको ब्लूमबर्गले जनाएको छ ।
यसैबीच, चीनले कतारसँग ग्यास उद्योगको सबैभन्दा लामो समयसम्म चलेको सम्झौतामा हस्ताक्षर गरेको छ ।
गत महिना दोहाले चाइना नेसनल पेट्रोलियम कर्पोरेसनलाई वार्षिक ४० लाख टन आपूर्ति गर्ने २७ वर्षे सम्झौताको घोषणा गरेको थियो ।
यो चीनको सिनोपेकसँग नोभेम्बरमा भएको सम्झौताको शर्तसँग मेल खान्छ जुन उद्योगमा अहिलेसम्म देखिएको सबैभन्दा लामो हो ।
चीन, जापान, दक्षिण कोरिया र अन्य एसियाली देशहरू कतारी ग्यासको मुख्य बजार हुन् । गत वर्षको सुरुमा युक्रेनमा रूसको आक्रमणपछि युरोपेली देशहरूले पनि यसको बढ्दो रूपमा खोजी गरिरहेका छन् ।
विश्वको सबैभन्दा ठूलो प्राकृतिक ग्याँस भण्डार रहेको खाडीअन्तर्गत इरानी क्षेत्रमा फैलिएको उत्तरी क्षेत्रमा गतिविधिहरू विस्तार गरेर कतारले आफ्नो एलएनजी उत्पादन कम्तिमा ६० प्रतिशतले बढाउने अपेक्षा गरेको छ । यो योजनाले कतारलाई सन् २०२७ सम्ममा वार्षिक १२६ मिलियन टन उत्पादन गर्न सक्षम बनाउनेछ ।
