निकोपोल (युक्रेन) । युक्रेनमा रुसी आक्रमणको ५००औँ दिनमा पनि युद्ध अन्त्य हुने कुनै आभास महसुस नगरेको त्यहाँका सर्वसाधारणले बताएका छन् ।
युद्ध सुस्ताउनुको सट्टा चर्किंदै गएको छ । युक्रेनका मुख्य सहरहरू निरन्तर खतरामा परेका छन् । युक्रेनी सैनिक पर्याप्त हातहतियार र गोलाबारुदको अभावबीच आफ्नो पदीय दायित्व पूरा गर्न रुसी आक्रमणको प्रतिरोध गर्दै विस्तारै अघि बढिरहेका छन् ।
जुन महिनाको सुरुदेखि नै युक्रेनको सेनाले पूर्व र दक्षिणमा रुसी सेनाले कब्जा गरेको क्षेत्र पुनः प्राप्त गर्न आक्रमण गरिरहेको छ । आक्रमणबाट क्षति व्यहोरेको रुसी सेनाले क्रूर प्रतिरोध गरिरहेको छ ।
दक्षिणी युक्रेनको निकोपोल सहरकी ७३ वर्षीया अवकाशप्राप्त शिक्षिका एन्टोनिना मोराखोवस्काले भनिन्, “रुसी सेनाले बलियो किल्ला निर्माण गरेका छन्, उनीहरूसँग धेरै उपकरणहरू छन् ।”
मोराखोवस्काले भनिन्, “म देख्छु, हाम्रो सेना कसरी अगाडि बढ्छ ? यो वर्षामा उनीहरूका लागि सजिलो छैन । हाम्रा लागि लडिरहेका तिनीहरूको भविष्यबारेमा म सधैँ सोच्छु । तर, के गर्ने ? कमजोर परिस्थितिले युक्रेनलाई घाटामाथि घाटा भइरहेको देखाउँछ ।”
उनले एएफपीसँग भनिन्, “यो सत्यको लागि लडाइँ हो । जित कठिन छ, तर हामी कुनै दिन अवश्य जित्नेछौँ ।”
पश्चिमी सैन्य सहायताका रूपमा अर्बौँ युरो प्राप्त गरे तापनि युक्रेनी सेनाले आक्रमण सुरु भएदेखि लगभग एक दर्जन गाउँहरू र केही सय वर्ग किलोमिटर क्षेत्र मात्र फिर्ता लिन सफल भएको छ ।
युक्रेनको सेनाले गएको सेप्टेम्बरमा खार्किभ क्षेत्रको नौ हजार वर्ग किलोमिटर र नोभेम्बरमा खेरसन क्षेत्रको पाँच हजार वर्गकिलोमिटर क्षेत्र पुनः कब्जा गरेको थियो ।
युक्रेनका राष्ट्रपति भ्लोदिमिर जेलेन्स्कीले आउँदो हप्ता हुने नेटो शिखर सम्मेलनको पूर्वसन्ध्यामा पश्चिमा शक्तिलाई लामो दूरीका हतियार र एफ–१६ लडाकु विमानका लागि दबाब दिएका छन् ।
“आक्रमण तीव्र गतिमा हुँदैन, यो सत्य हो । तर पनि हामी अगाडि बढिरहेका छौँ,” यसै साता प्रागको भ्रमणका क्रममा राष्ट्रपति जेलेन्स्कीले भनेका थिए ।
