ब्रसेल्स- युरोपेली सङ्घ ईयूका शीर्ष कूटनीतिज्ञले वाग्नरको विद्रोहले दशकौं यताकै सबैभन्दा ठूलो राजनीतिक सङ्कट निम्त्याएपछि कमजोर बनेका रूसी राष्ट्रपति भ्लादिमिर पुटिनले ‘भयानक खतरा’ निम्त्याउन सक्ने चेतावनी दिएका छन् ।
“पुटिन कमजोर हुनुले थप खतरा निम्त्याएको छ । त्यसैले हामीले यसको परिणामबारे धेरै सजग हुनुपर्छ,” ब्रसेल्समा इयू नेताहरूको भेलाअघि जोसेप बोरेलले भने ।
“अहिलेसम्म हामी रूसलाई खतराको रूपमा हेरिरहेका थियौं किनभने यो धेरै बलियो थियो र युक्रेनमा बल प्रयोग गरिएको छ । अब हामीले आन्तरिक अस्थिरताका कारण रूसलाई जोखिमकारूपमा हेर्नुपर्छ,” बोरेलले भने ।
सन् १९९९ मा वाग्नरका प्रमुख येभगेनी प्रिगोजिनले विद्रोहको नेतृत्व गरेपछि पुटिनले सन् १९९९ मा सत्तामा आएयताको सबैभन्दा ठूलो चुनौतीको सामना गर्नुपरेको थियो ।
यसैबीच, ईयू प्रमुख उर्सुला भोन डेर लेयेनले विद्रोहले ‘पराकम्पन’ निम्त्याउने बताउँदै युक्रेनको सैन्य क्षमता होस् वा आर्थिक सहयोग, युक्रेनको लागि समर्थन दोब्बर पार्नु महत्वपूर्ण हुने बताइन् ।
नेटोका प्रमुख जेन्स स्टोल्टेनबर्गले बिहीबार ईयूका नेताहरूसँग मध्याह्न भोजन गर्ने क्रममा वाग्नरको कार्यले रूसको ‘राजनीतिक सङ्कट र विभाजन’ उजागर भएको बताएका थिए ।
तर उनले कुनै पनि अन्तिम निष्कर्षमा पुग्न हतार हुने चेतावनी दिए ।
स्टोलटेनबर्गले आगामी महिना भिल्नियसमा हुने नेटोको बैठकमा युक्रेनलाई सैन्य सहयोग गर्ने नयाँ घोषणा हुने अपेक्षा गरेको बताए ।
युरोपले ‘युद्धको समयमा र पछि’ युक्रेनलाई समर्थन गर्दै लामो यात्रा’ का लागि युक्रेनलाई सहयोग गर्नुपर्ने भन्दै बोरेलले ‘युक्रेनी रक्षा कोष’ सिफारिस गरेका थिए ।
उनले उक्त कोषले युक्रेनी सेनाको आधुनिकीकरणमा सहयोग पु¥याउने र युद्धग्रस्त देशको सुरक्षा सुनिश्चित गर्न इयूको प्रतिबद्धता रहेको बताए ।
