मुगु । छायाँनाथ रारा नगरपालिका–१ छत्याल बाडाकी ७० वर्षीया चुम्फा नेपाली निःशुल्क आँखा उपचार हुन्छ भनेर जिल्ला आँखा उपचार केन्द्र मुगुमा आइन् । रेडियो लगायत सञ्चार माध्यमबाट निःशुल्क आँखा शिविर सञ्चालन हुने सूचना पाएकै भरमा उनी शिविरमा आइन् । शिविरमा आएर मोतिया विन्दुको सफल शल्यक्रियापछि उनी खुसी भएकी छन् ।
‘आँखाको अपरेसन निःशुल्क भयो । अब अरूले झैँ राम्ररी देख्न र हेर्न पाउने भएँ,’ आँखाको ज्योति पुनः पाएपछि उनले खुसी हुँदै भनिन् । श्रीमान प्रदिप नेपालीको ६ वर्षअघि निधन भयो । सोही बेलादेखि आँखामा समस्या भएको उनले बताइन् । श्रीमानको निधनसँगै आँखाको ज्योति पनि धमिलो हुँदै गएको उनले जानकारी दिइन् ।
‘श्रीमानको निधनकै बेलादेखि धमिलो हुँदै गएको थियो । पछि देख्नै नसक्ने भएँ,’ उनले भनिन्, योभन्दा ठूलो पिडा के होला र ? तर, अहिले शल्यक्रियापछि आफूले फेरि संसार देख्न पाएको चुम्फाले बताइन् । नेपाल नेत्र ज्योति संघ जिल्ला आँखा उपचार केन्द्र मुगुको आयोजना हिमालय आँखा अस्पताल घाँरीपाटन पोखरा र नेपाल नेत्र ज्योति संघ एकीकृत आँखा कान स्वास्थ्य कार्यक्रम कर्णाली प्रदेशको आर्थिक तथा प्राविधिक सहयोगमा जिल्लामा निःशुल्क आँखा चेकजाँच गरिएको हो ।
शिविर तीन दिनसम्म सञ्चालन हुनेछ । दोस्रो दिनसम्म ३५ जना आँखाका बिरामीको मोतियाबिन्दु गरिएको छ । जसमा २१० जना आँखाका बिरामीलाई निःशुल्क चेकजाँच गरिएको नेपाल नेत्र ज्योति संघ केन्द्रीय उपाध्यक्ष तिलकबहादुर मल्लले बताए ।
बुधबारबाट सुरु भएको तीनदिने शिविरमा मोतीबिन्दु, मासु पलाएको रोगको निःशुल्क शल्यक्रियालगायत आँखा सम्बन्धी सम्पूर्ण उपचारहरू निःशुल्क प्रदान गरिने, आँखाको बिरामीहरुको पहिचान गरि आबश्यक अनुसारका चस्मा प्रयोग, औषधि, परामर्श दिने गरिएको हिमालय आँखा अस्पताल बाट शिविरमा आउनु भएका डा. गोविन्द नाथ योगीले जानकारी दिए ।
