काठमाडौं । बलिउड अभिनेता विवेक आनन्द ओबराय आगामी साता नेपाल भ्रमणमा आउने भएका छन् । मंसिर २८ गते (डिसेम्बर १४)मा उनी परिवारसहित काठमाडौं आइपुग्ने छन् ।
एक भिडियो सन्देश जारी गर्दै उनले आफू स–परिवार नेपाल भ्रमणमा आउन लागेको बताएका छन् । आमाबाबु, श्रीमती, छोराछोरीका साथ नेपाल आउन लागेको उनले जानकारी दिएका छन् ।
एक साताको नेपाल बसाइँमा उनले नेपालको सगरमाथा बेसक्याम्प, पोखरा, लुम्बिनी र काठमाडौंको पशुपतिनाथलगायतका अन्य ठाउँको भ्रमण गर्नेछन् । उनी लुम्बिनीमा आयोजना हुने एक विशेष कार्यक्रममा समेत सहभागी हुने बताएका छन् ।
नेपाल भ्रमणलाई लिएर आफू उत्साहित रहेको अभिनेता ओबरायले बताएका छन् । ‘नेपाल यस्तो देश हो, जससँग भारतको वर्षौदेखि सुन्दर सम्बन्ध, एकता छ’ भिडियो सन्देशमा उनले भनेका छन्, ‘हामी नेपाली र नेपाली हामीजस्तै छौँ ।’
उनले आफ्नो २० वर्षको अभिनय करिअरमा नेपाली फ्यानले दिएको मायालाई सम्झिरहेको बताएका छन् । नेपाल भ्रमणमा रहँदा ट्यालेन्ट कलाकार एवं उद्यमीलाई प्रमोशन गर्न प्रयास गर्ने समेत उनले बताएका छन् । उनले नेपाल घुमेपछि अरुलाई पनि नेपाल घुम्न जान र महसुस गर्न प्रेरित गर्ने उनले उद्घोष गरेका छन् ।
