काठमाडौं । काठमाडौं महानगरपालिकाका मेयर बालेन साह नेतृत्वको टोलीले काठमाडौं मलको अगाडिको अवैध पसल, खिचापोखरीमा रहेको आरबि कम्प्लेक्सका अव्यवस्थित पसलहरू भत्काएको छ भने रंजनागल्लीको कोजी कम्प्लेक्स र न्युरोडको केषा प्लाजालाई पुन: मिति दिएर फर्किएको छ ।
पार्किङका लागि नक्सा पास भएको स्थानमा बनाइएको क्याफे खाली तत्काल भत्काउन साहले निर्देशन दिएका छन् ।
पार्किङका लागि नक्सा पास गरेर सटर भाडामा दिएपछि महानगरले खाली गराउन थालेकाे महानगरपालिकाले जनाएको छ । यसअघि ३५ दिने सूचना निकाल्दा पनि अटेरी गरेपछि महानगरले अवैध संरचना भत्काउने अभियान चलाएको हो ।
साहले सबै खाले अवैध संरचना हटाएरै छाड्ने बताएका छन् । उनले काठमाडौं जिल्ला अदालतको अन्डरग्राउन्ड पनि खाली गराउने बताए । साहले गैरकानुनी संरचना बनाएर भाडामा लगाउने व्यक्ति दोषी हुने बताएका छन् ।
महानगरले यसअघि बानेश्वर क्षेत्रका घरका अण्डरग्राउण्ड पार्किङमा थापिएका संरचना भत्काएको थियो ।
